PLATO AUR 2 TARAH KI AATMAAYEIN (SOULS) – WISE AND UNWISE SOUL

Plato ke Hisab se Do Tarah ki Aatma Hoti Hain

Plato kehte hain ki har insaan ke andar do tarah ki aatma ho sakti hai — Wise Aatma (Wise Soul) aur Unwise Aatma (Unwise Soul).

Wise Soul woh hoti hai jo soch-vichaar karke faisla leti hai. Bohot sochti hai — kya sahi hai, kya galat hai.

Lekin Plato ke student Aristotle ne ispe objection kiya tha. 

Usne kaha – “Wise aadmi sirf sochta hi reh jaata hai, kuch karta nahi!” 

Matlab?

Ek example lo – koi aadmi sochta rahe: 

“Agar maine yeh kaam kiya toh meri behen naraaz ho jaayegi, uski shaadi me bura asar padega, bhanja gussa karega…” 

Is tarah se woh aadmi 2 ghante tak sochta hi rahega, kaam karega hi nahi.

Lekin Plato kehte hain: “Soch samajh ke kaam karna hi asli buddhimaani hai.” Jaldi mein faisla lena — woh toh shaitaan ki chaal hai. Isliye Plato kehna chahte hain ki har aadmi ke andar ek Wise Soul honi chahiye.

---

Wise Soul ke 2 Basic Features – Love aur Beauty

1. Platonic Love – Ek Shudh Prem

Wise Soul ke andar ek anokha love hota hai – Platonic Love. 

Yeh pyaar jisme na vaasna (lust) hoti hai, na koi physical touch. Sirf appreciation hoti hai. Aatma aatma se pyaar karti hai, na ki sharir se. Sharir se pyaar karoge toh ek din dukh milega, kyunki sharir toh ek din khatam ho jaayega. Aatma agar aatma se prem karegi, toh woh hamesha ke liye chalega – permanent aur pure.

Is pyaar mein na selfishness hoti hai, na desire. Sirf respect aur appreciation. 

Log kehte hain: “Arey bhai! Love bina touch ke? Yeh kaise possible hai?” 

Plato kehte hain: “Bas! Yahi sacha pyaar hai.”

2. Beauty ki Khoj – Har Cheez Mein Khoobsurti Dekhna

Wise Soul har jagah beauty dekhti hai. Ek nadi beh rahi hai – uske kinare khade hokar uski awaaz bhi ek music lagti hai. Chidiya chahchaha rahi hai – uski awaaz mein sweetness lagti hai. Matlab, Wise Soul ke paas ek special nazar hoti hai – har cheez mein sundarta dekhne wali nazar.

---

Wise Soul – Truth and Lie ka Difference 

Jab moral decisions lene hote hain, toh wise soul turant samajh jaati hai — kya satya hai aur kya asatya. 

Yeh aatma kabhi nahi marti. Jab yeh duniya chhodti hai, toh Ideas ke pure aur perfect world mein chali jaati hai — jise Plato kehte hain “World of Ideas” – ab dobara janam bhi nahi legi aatma ( Aisa plato ka belief tha).

---

Unwise Soul – Jo Hamesha Burai Mein Khoj Lagaye

Dusri taraf hoti hai Unwise Soul — jo har cheez mein negatives hi dekhegi. Usko perfection kabhi dikhayi hi nahi deta. Har kisi mein kuch na kuch galti dhoondhegi.

Yeh log kabhi bhi truth, goodness ya beauty ke raste par nahi ja sakte. Unka mann asatya ki taraf chala jaata hai.

Jahan paap ho, galat kaam ho, wahan jaldi attract ho jaate hain.

---

Unwise Soul ka Future – Dukh aur Downfall

Plato kehte hain — jab yeh aatma mar jaati hai, toh yeh Ideas ke perfect world mein jaane layak nahi banti.

Isliye yeh niche ke yoni mein janam leti hai – jaise janwar, suar, billi, kutta.

Yeh aatma phir takleef se bhare hue jagah mein rehti hai – jahaan sirf pain hi pain hota hai. Aap ise hamari bhasha mein Narak (Hell) keh sakte ho.

Plato ne Swarg-Narak ka direct concept nahi diya, lekin yeh idea usi tarah ka hai.